महाराष्ट्रात साधारणतः 40 लाख शेतकरी उसाचे पीक घेतात. महाराष्ट्राच्या साखर उद्योगाची प्रत्यक्ष व अप्रत्यक्षरित्या वार्षिक उलाढाल साधारणतः एक लाख कोटीपेक्षा जास्त रकमेची आहे. राज्यातील उसाचे क्षेत्र 14.87 लाख हेक्टर पेक्षा जास्त आहे. राज्याच्या आर्थिक व सामाजिक विकासात साखर उद्योगाचे मोठे योगदान आहे. देशाच्या साखर उत्पादनात महाराष्ट्राचा एक तृतीयांश इतका वाटा आहे . ग्रामीण भागात साखर उद्योगामुळे शैक्षणिक संस्था, हॉस्पिटल्स, ग्राहक संस्था, उपसा जलसिंचन योजना, कृषी सेवा केंद्र, यांचे जाळे तयार झाले आहे. साखर उद्योगामुळे आसवन्या, इथेनॉल, सहवीज निर्मिती, पार्टिकल बोर्ड, खते, ठिबक सिंचन, ऑक्सिजन निर्मिती, ग्रीन हायड्रोजन निर्मिती, इतर रसायने उत्पादने व कृषीवर आधारित उद्योगांची निर्मिती झाली आहे. राज्यातील ऊस उत्पादक शेतकऱ्यांची संख्या तीस लाख इतकी साधारणतः आहे. सर्व साखर कारखान्यात काम करणाऱ्या कामगारांची संख्या दोन लाखाच्या आसपास आहे. सन 2023-24 हंगामात सहकारी तत्त्वावरील 104 व खाजगी तत्त्वावरील 104 असे एकूण 208 साखर कारखाने चालू होते. या कारखान्यांची दैनिक गाळप क्षमता 9,51,150 (TCD) इतकी आहे. या कारखान्यांनी हंगामामध्ये 1076.18 लाख मे.ट. इतक्या उसाचे गाळप केले आहे व 10.27% साखर उता-याने 1101.7 लाख क्विंटल साखरेचे उत्पादन केले आहे.